د پاکستان حکومت د سایبر جرمونو د پلټنو او مخنيوي دپاره د ( نيشنل سايبر کرايم انوېسټيګېشن ايجنسۍ) په نوم نوې اداره جوړه کړې ده. ويل شوي د مرکزي تحقیقاتي ادارې (اېف آی اې) څخه د سايبر جرمونو د پلټنو واک بيرته اخستل شوی دی.
د پاکستان د انفارمېشن ټکنالوجۍ او ټيلي کميونيکېشن وزارت په اعلامیه کې ویلي، اېن سي سي آی اې د الېکټرانک جرمونو د قانون 2016م د 29مې مادې لاندې په عمل کې راوستل شوې او د سایبر جرمونو د مقدمو پلټنې به کوي.
له دې وړاندې به د سایبر جرمونو پلټنې مرکزي تحقيقاتي ادارې (اېف آی اې) کولې.
ويل شوي، د اېن سي سي آی اې مشر به د 21 ګرېډ افسر وي او د صوبې د پوليس مشر هومره واک به ورسره وي.
د زيارت/ پنجشنبې په ورځ د اطلاعاتو وزير عطاالله تارړ ويلي وو، حکومت د ډيجيټل حقونو د خوندي کولو او په ټولنيزو رسنیو د پروپېګنډې او اوازو د مخنيوي دپاره په نوې اداره جوړولو غور کوي.
تارړ په خبري کانفرنس کې ویلي وو، په وروستیو کې په ټولنيزو رسنيو په انلاين بڼه د ځورونو او جعلي خبرونو کمپاين ليدل شوی، بايد په انلاين بڼه هر ډول ځورولو ته د پای ټکې کېښودل شي.
په ټولنيزو رسنیو د اېن سي سي آی اې په اړه بحث پيل شوی چې دغه اداره به د خبريالانو پرضد کاريږي، حکومت د دغه لارې سنسرشپ سېوا کول غواړي بايد د جعلي خبرونو د مخنيوي دپاره هغو ادارو ته رسايي وکړل شي کومې چې د جعلي خبرونو ضد کار کوي.
خبريالې بېنظير شاه ويلي، "حکومت وايي د ټولنيزو رسنيو نوی قانون او نوې اداره د ښځو دپاره ده خو دا ټولې بهانې دي، اصل مقصد یې سنسرشپ دی".
بېرسټر سلمان اکرم راجه په اېکس (پخواني ټويټر) ويلي، "په ټولنیزو رسنیو پابنديانې نورې سختې شوې، که چرته نن مونږ په دې غږ پورته نه کړو، نو راتلونکې ورځې به د قيامت نه کمې نه وي".
تېره مياشت د پاکستان د کورنیو چارو وزارت ویلي وو، پاکستان کې په "اېکس" رسنۍ د ځینو اکاونټونو نه د سپریم کورټ د چیف جسټس په ضد پروپېګنډه شوې وه او اېکس د دغو اکاونټونو د تړلو په اړه د پاکستان خواست ته څه ځواب نه وو ویلی ځکه پاکستان کې دا ټولنیزه رسنۍ تړل شوې وه.
په پاکستان کې ایکس رسنۍ د 17مې فرورۍ راهسې تړل شوې ده او د دې تړل کېدو په ضد اسلام اباد هایکورټ، سیند هایکورټ او پېښور هایکورټ ته خواستونه هم شوي دي.
څېړونکي او نړیوالې ادارې پاکستان کې د اېکس رسنۍ تړل کېدل د رای څرګندولو د حق تروړلو په مانا عمل بولي او وایي په سوشل میډیا د بندیزونو لګولو له لارې پاکستان کې د غیر جمهوري او غیر قانوني اقداماتو نه د نړۍ مخه نه شي اړول کیدای.
د پاکستان ټيلي کميونيکېشن اتهارټۍ (پي ټي اې) سیند هايکورټ ته ویلي وو، د ټولنيزې رسنۍ اېکس (پخواني ټویټر) د بندولو حکم د کورنيو چارو وزارت کړی وو.
د پاکستان سيند هايکورټ ته د اېکس رسنۍ د بنديز خلاف فعالو خواست کوونکو ويلي وو، د اېکس د بندولو مقصد د اتمې فرورۍ په عامو انتخاباتو کې د درغليو په تورونو د خلکو د جذباتو د څرګندونو غلي کول وو.
خو د پي ټي اې وکیلانو عدالت ته په ورکړو اسنادو کې ویلي، پي ټي اې د پاکستان د استخباراتي ادارو د 17مې فرورۍ حکم منلی دی.
عدالت ته په ورکړل شوو اسنادو کې ویل شوي وو، د استخباراتي ادارو په رپورټونو د کورنیو چارو وزارت په سمدستي ډول د بل حکم پورې د اېکس د بندولو حکم کړی وو، ځکه د ټولنيزو رسنيو پاڼه اېکس (پخوانی ټویټر) بلاک يا بند کړل شوی دی.
Forum